Мэдээ

1600 ДААМЧИНТАЙ СУРГУУЛЬ

Баянгол дүүргийн "Монгени" сургуулийн ангиудын аварга шалгаруулах зуун буудалт даамын тэмцээн гурван өдөр үргэлжилж өндөрлөлөө. Тус тэмцээнд 1600 даамчин-сурагчид ухаанаа уралдуулсан байна. "Монгени" цогцолборт блиц тоглолтын дэлхийн аварга Б.Есүй суралцдаг бол даамын багшаар спортын мастер Т.Пүрэвдорж ажилладаг билээ.

МДХ-НЫ ЕРӨНХИЙЛӨГЧ А.УНДРАА ТАМИРЧДАДАА ХҮНДЭТГЭЛ ҮЗҮҮЛЭВ

Монголын даамын холбооны ерөнхийлөгч, УИХ-ын гишүүн А.Ундраа өөрийн фэйсбүүк хуудсандаа 

"Дэлхийн аварга шалгаруулах тэмцээнд оролцож амжилт гаргасан тамирчдыг хүлээн авч уулзан, баяр хүргэлээ. Турк улсад болсон 100 буудалт даамын өсвөр, залуучуудын Дэлхийн аварга шалгаруулах тэмцээнд Монгол Улсын баг тамирчид нийлбэр дүнгээрээ II байрт шалгарч Э.Хүслэн алт, М.Шийравжамц мөнгө, Б.Анужин мөнгө, Б.Мишээл хүрэл, Э.Даариймаа хүрэл медалийн эзэд болжээ. Амжилттай оролцоод ирсэн хүүхэд залуус, багш, дасгалжуулагч болон Монголын Даамын Холбооны хамт олондоо халуун баяр хүргэж улам их амжилтыг хүсэн ерөөе" хэмээн постолсон байна. 

“НАХИА” ӨСВӨРИЙН ЛИГИЙН ТЭМЦЭЭНИЙ УДИРДАМЖ

Нэг. Нийтлэг зүйл
1. 1. Тэмцээний зорилго нь бага насны тамирчдын тоглолтын ур чадварыг дээшлүүлэхэд оршино.
1. 2. Тэмцээн охид, хөвгүүд 7, 8, 9, 10 насны ангиллаар, үндсэн төрлөөр явагдана.
1. 3. Тэмцээн МДХ-ны дүрмийн явагдана.
1. 4. Тэмцээнийг МДХ, “Шавь” клуб хамтран зохион байгуулна.

Хоёр. Тэмцээний зохион байгуулалт
2. 1. Тэмцээн 2019 оны 11 дүгээр сарын 16-ны өдөр Шавь клуб дээр явагдана.
2. 2. Тоглогчдыг 9.00-10.30 цагт бүртгэж 11.00 цагаас тоглолт шууд эхэлнэ.
2. 3. Тэмцээний хураамж 10 000₮.

Б.МИШЭЭЛИЙН НЭРЭМЖИТ ТЭМЦЭЭНИЙ УДИРДАМЖ

ОЛОН УЛСЫН ИХ МАСТЕР Б. МИШЭЭЛИЙГ АЛДАРШУУЛАХ ТЭМЦЭЭН 

Өсвөр үе, насанд хүрэгчдийн Ази тивийн аварга, өсвөр үе, залуучуудын дэлхийн аварга шалгаруулах тэмцээний мөнгө, хүрэл медальт, олон улсын их мастер
Б. Мишээлийг алдаршуулах, зуун буудалт даамыг түгээн дэлгэрүүлэх зорилгоор зохиогдож буй тэмцээнд идэвхтэй оролцоорой.

Тэмцээн: 2019 ОНЫ 11-Р САРЫН 16-НЫ ӨДӨР И-МАРТ ЧИНГИС САЛБАРЫН 6 ДАВХАРТ БОЛНО.

МОНГОЛ УЛС БАГИЙН ДҮНГЭЭР ХОЁРДУГААР БАЙРТ

Туркийн Измир хотноо 2019 оны аравдугаар сарын 27-ноос арваннэгдүгээр сарын 4-ний өдрүүдэд зохиогдсон өсвөр, залуучуудын ДАШТ-ээс Монгол Улсын баг тамирчид нийт 5 медаль хүртсэн билээ. Багийн дүн гаргахад үндсэн төрөлд 1 алт, 1 мөнгө, 1 хүрэл медаль хүртсэн амжилтаар нийт 19 улсаас ОХУ-ны дараа хоёрдугаар байр эзэлсэн байна. Харин түргэн тоглолтын төрөлд 1 мөнгө, 1 хүрэл медаль авсан амжилтаар ОХУ, Беларусийн дараа гуравдугаар байранд жагссан байна. 

Б.АНУЖИН МӨНГӨ, Э.ДААРИЙМАА ХҮРЭЛ МЕДАЛЬ ХҮРТЭВ

Дэлхийн аварга шалгаруулах тэмцээний сүүлийн өдөр түргэн тоглолт буюу блиц төрлийн медальтнууд тодорлоо. Энэ удаа манай тамирчдаас U-17 насанд спортын мастер Б.Анужин мөнгө, U-11 насанд дэд мастер Э.Даариймаа хүрэл медаль хүртэв.

МОНГОЛЫН ДААМЧИД ДАШТ-Д ХЭРХЭН ОРОЛЦОВ?

ДАШТ-ий үндсэн төрөлд Монголын баг тамирчид алт, мөнгө, хүрэл медаль нэжгээдийг хүртлээ. ДДХМ Э.Хүслэн 15 оноо (6 хожиж, 3 тэнцсэн)-гоор охидын 11-13 насны ангилалд түрүүллээ. ОХУ-ын Сандаара Апросимова түүнтэй адил оноотой тэмцээнээ дуусгасан ч коэффициент буюу нэмэлт үзүүлэлтээр манай тамирчин алтан медалийн болзол хангасан юм.

Э.ХҮСЛЭН ДЭЛХИЙН АВАРГА БОЛЛОО

Тэмцээний охидын 11-13 насны ангилалд ДДХМ Энхболдын ХҮСЛЭН 15 оноо (6 хожиж, 3 тэнцсэн)-гоор аваргаллаа. Ийнхүү тэрбээр Монгол Улсаас зуун буудалт даамын үндсэн төрөлд дэлхийн аварга цолыг хүртсэн гурав дахь тамирчин боллоо. Өмнө нь 2007 онд Г.Гэрэлболд, 2016 онд М.Шийравжамц нар үндсэн төрлөөс алтан медаль хүртэж байв.

М.ШИЙРАВЖАМЦ МӨНГӨН МЕДАЛЬ ХҮРТЭВ

Туркт болж буй ДАШТ-ий 17-19 нас буюу залуучуудын ангилалд өрсөлдсөн ДДХМ Мөнхбаатарын ШИЙРАВЖАМЦ 13 оноо (4 хожиж, 5 тэнцсэн) авсан амжилтаар МӨНГӨН медалийн болзол хангалаа. Төгсгөлийн тойрогт тэрбээр ОХУ-ын Роман Лдоковтой тэнцсэн бол түүний гол өрсөлдөгч Анатолий Протодяконов Суринамын Bhagwandas, Arwien-ыг хожиж, ДАШТ-ий 5 дахь алтан медалиа хүртсэн байна. М.Шийравжамц нь 2016 онд мөн Измирт болсон ДАШТ-ий 14-16 насны ангилалд түрүүлж, дэлхийн аварга болж байсан билээ.

Б.МИШЭЭЛ АНХНЫ МЕДАЛИЙГ АВЧИРЛАА

Туркийн Измир хотноо болж буй өсвөр, залуучуудын ДАШТ-ий охидын 8-10, 17-19 насны ангиллын дүн гарчээ. Монголын багийн анхны медалийг залуучуудын ангилалд тоглосон ОУИМ Б.Мишээл хүртлээ. Тэрбээр 8 тавил тоглохдоо 11 оноо авч, хүрэл медалийн болзол хангасан байна.

Удахгүй болох үйл явдал

Товлогдсон үйл явдалгүй