Мэдээ

Б.МИШЭЭЛИЙН НЭРЭМЖИТ ТЭМЦЭЭНИЙ УДИРДАМЖ

ОЛОН УЛСЫН ИХ МАСТЕР Б. МИШЭЭЛИЙГ АЛДАРШУУЛАХ ТЭМЦЭЭН 

Өсвөр үе, насанд хүрэгчдийн Ази тивийн аварга, өсвөр үе, залуучуудын дэлхийн аварга шалгаруулах тэмцээний мөнгө, хүрэл медальт, олон улсын их мастер
Б. Мишээлийг алдаршуулах, зуун буудалт даамыг түгээн дэлгэрүүлэх зорилгоор зохиогдож буй тэмцээнд идэвхтэй оролцоорой.

Тэмцээн: 2019 ОНЫ 11-Р САРЫН 16-НЫ ӨДӨР И-МАРТ ЧИНГИС САЛБАРЫН 6 ДАВХАРТ БОЛНО.

МОНГОЛ УЛС БАГИЙН ДҮНГЭЭР ХОЁРДУГААР БАЙРТ

Туркийн Измир хотноо 2019 оны аравдугаар сарын 27-ноос арваннэгдүгээр сарын 4-ний өдрүүдэд зохиогдсон өсвөр, залуучуудын ДАШТ-ээс Монгол Улсын баг тамирчид нийт 5 медаль хүртсэн билээ. Багийн дүн гаргахад үндсэн төрөлд 1 алт, 1 мөнгө, 1 хүрэл медаль хүртсэн амжилтаар нийт 19 улсаас ОХУ-ны дараа хоёрдугаар байр эзэлсэн байна. Харин түргэн тоглолтын төрөлд 1 мөнгө, 1 хүрэл медаль авсан амжилтаар ОХУ, Беларусийн дараа гуравдугаар байранд жагссан байна. 

Б.АНУЖИН МӨНГӨ, Э.ДААРИЙМАА ХҮРЭЛ МЕДАЛЬ ХҮРТЭВ

Дэлхийн аварга шалгаруулах тэмцээний сүүлийн өдөр түргэн тоглолт буюу блиц төрлийн медальтнууд тодорлоо. Энэ удаа манай тамирчдаас U-17 насанд спортын мастер Б.Анужин мөнгө, U-11 насанд дэд мастер Э.Даариймаа хүрэл медаль хүртэв.

МОНГОЛЫН ДААМЧИД ДАШТ-Д ХЭРХЭН ОРОЛЦОВ?

ДАШТ-ий үндсэн төрөлд Монголын баг тамирчид алт, мөнгө, хүрэл медаль нэжгээдийг хүртлээ. ДДХМ Э.Хүслэн 15 оноо (6 хожиж, 3 тэнцсэн)-гоор охидын 11-13 насны ангилалд түрүүллээ. ОХУ-ын Сандаара Апросимова түүнтэй адил оноотой тэмцээнээ дуусгасан ч коэффициент буюу нэмэлт үзүүлэлтээр манай тамирчин алтан медалийн болзол хангасан юм.

Э.ХҮСЛЭН ДЭЛХИЙН АВАРГА БОЛЛОО

Тэмцээний охидын 11-13 насны ангилалд ДДХМ Энхболдын ХҮСЛЭН 15 оноо (6 хожиж, 3 тэнцсэн)-гоор аваргаллаа. Ийнхүү тэрбээр Монгол Улсаас зуун буудалт даамын үндсэн төрөлд дэлхийн аварга цолыг хүртсэн гурав дахь тамирчин боллоо. Өмнө нь 2007 онд Г.Гэрэлболд, 2016 онд М.Шийравжамц нар үндсэн төрлөөс алтан медаль хүртэж байв.

М.ШИЙРАВЖАМЦ МӨНГӨН МЕДАЛЬ ХҮРТЭВ

Туркт болж буй ДАШТ-ий 17-19 нас буюу залуучуудын ангилалд өрсөлдсөн ДДХМ Мөнхбаатарын ШИЙРАВЖАМЦ 13 оноо (4 хожиж, 5 тэнцсэн) авсан амжилтаар МӨНГӨН медалийн болзол хангалаа. Төгсгөлийн тойрогт тэрбээр ОХУ-ын Роман Лдоковтой тэнцсэн бол түүний гол өрсөлдөгч Анатолий Протодяконов Суринамын Bhagwandas, Arwien-ыг хожиж, ДАШТ-ий 5 дахь алтан медалиа хүртсэн байна. М.Шийравжамц нь 2016 онд мөн Измирт болсон ДАШТ-ий 14-16 насны ангилалд түрүүлж, дэлхийн аварга болж байсан билээ.

Б.МИШЭЭЛ АНХНЫ МЕДАЛИЙГ АВЧИРЛАА

Туркийн Измир хотноо болж буй өсвөр, залуучуудын ДАШТ-ий охидын 8-10, 17-19 насны ангиллын дүн гарчээ. Монголын багийн анхны медалийг залуучуудын ангилалд тоглосон ОУИМ Б.Мишээл хүртлээ. Тэрбээр 8 тавил тоглохдоо 11 оноо авч, хүрэл медалийн болзол хангасан байна.

“ЭНЭРЭЛ” ДС-ИЙН НЭРЭМЖИТ ТЭМЦЭЭН БОЛОВ

Даамын спортын мастер, доктор профессор, Монгол Улсын гавьяат багш Д.Дорж багшийн үүсгэн байгуулсан анагаах ухааны “Энэрэл” дээд сургуулийн 20 жилийн ойн баярын хүрээнд зохиогдсон 100 буудалт даамын тэмцээн энэ сарын 25-27-нд явагдаж өндөрлөлөө. Тэмцээнд олон улсын их мастер 1, Дэлхийн даамын холбооны мастер 5, Дэлхийн даамын холбооны дэд мастер 3, спорын мастер 9, дэд мастер 26, I ба II зэрэгтэй 21, нийт 68 тамирчин эрэгтэй, эмэгтэй, хүүхэд залуус, ахмад үеийнхэн холилдон швейцарь системээр 9 өрөг оюун ухаанаа уралдуулж дүнгээ гаргалаа.

Н.МӨНХТУЯА ДАШТ-ЭЭС МӨНГӨН МЕДАЛЬ ХҮРТЭВ

Голландын Бейлен хотноо болж буй түргэн тоглолтын дэлхийн аварга шалгаруулах тэмцээний эмэгтэйчүүдийн рапид тоглолтын төрөлд манай даамчин ДДХМ Насанбаярын МӨНХТУЯА мөнгөн медаль хүртлээ. Голланд улсад ажиллаж, амьдардаг тэрбээр 7 тоглохдоо 3 хожиж, 4 тэнцжээ. Ийнхүү 2019 онд Монголын даамчид насанд хүрэгчдийн ДАШТ-ээс хоёр ч медаль хүртлээ. Үүнээс өмнө 8-р сард Польшид зохиогдсон Хөгжлийн бэрхшээлтэй иргэдийн ДАШТ-ээс спортын мастер М.Хишигбаяр алтан медаль хүртээд байсан билээ.

ДОРНОГОВИЙН ДААМЧИД ТЭРГҮҮЛЛЭЭ

Дорноговь аймгийн ЗДТГ, Монгол улсын шилдэг дасгалжуулагч Ш.Өвгөн агсны гэр бүл, үр хүүхдүүд ивээн тэтгэж, Монголын даамын холбоо, аймгийн даамын холбоо хамтран Монгол улсын шилдэг дасгалжуулагч Ш.Өвгөн агсны нэрэмжит Ерөнхий боловсролын сургуулийн сурагчдын улсын аварга шалгаруулах даамын тэмцээнийг Сайншандад зохион байгууллаа. Тэмцээнд 3 аймаг, нийслэлийн 6 дүүргийн 160 гаруй тамирчин сурагч оролцож аваргууд тодорлоо. Багийн дүнгээр Дорноговь аймаг тэргүүлж, Сонгинохайрхан дүүрэг, Баянзүрх дүүрэг удааллаа.

Удахгүй болох үйл явдал

Товлогдсон үйл явдалгүй