Манай улсын эмэгтэй шатарчдаас төрсөн анхны олон улсын цолтон бол Сандагдоржийн Хандсүрэн юм. 1940 онд төрсөн тэрбээр 10 настайдаа шатар сурчээ. Улсын аварга шалгаруулах шигшээ тэмцээнд 12 удаа оролцож (эрэгтэйд 1 удаа) 128 өрөг тогложээ.

Хуучнаар Югослав улсын Врнячка-Баня хотноо 1961 онд болсон дэлхийн бүс хоорондын тэмцээнд Монгол улсын шатарчдаас анх удаагаа оролцсон юм. Сплейт, Скоплегийн олимпиадад амжилттай оролцож 1972 онд Скоплегийн дэлхийн шатрын олимпиадын үеэр Азийн 9-р бүсийн аварга шалгаруулах тэмцээн болж С.Хандсүрэн түрүүлснээр олон улсын мастер гэдэг нэр хүндтэй цол авч манай эмэгтэй шатарчдын дотроос анхны олон улсын мастер болсон билээ.

С.Хандсүрэн ЗХУ-д эдийн засгийн дээд сургууль дүүргэж улмаар МУИС-д тэтгэвэрт гартлаа багшилсан юм. Тус сургуульд багшлах хугацаандаа дэд эрдэмтний зэрэг хамгаалж, хожмоо Монгол улсын гавъяат багш болжээ.