Улсын аварга Цэгмидийн Батчулуун 1987 оны 2 дугаар сарын 4 – нд хорвоод мэндэлжээ. Батчулуун хүү анх “Ирээдүй” шатрын клубт дэд мастер Д. Сэржмядагаар шатрын “А” заалгаж “аварга болох аяны зам” – даа гарчээ. Тэрээр өсвөрийн шатарчдын улсын аврага шалгаруулах тэмцээний 6  удаагийн аварга бөгөөд сүүлийн үед явагдах болсон шилдэг мастеруудын тэмцээнүүдэд шагналт байранд тогтмол шалгарч байгаа шатарчин юм.

Батчулуун 2001 онд спортын мастер, 2006 онд олон улсын шатрын холбооны мастер цол тус тус хүртсэн нь залуу шатарчны ирмүүн өсөлтийн баталгаа мөн.

Тэрээр улсын аварга шалгаруулах шигшээ тэмцээнд 6 удаа хүч оюунаа сорьж 2006 онд улсын аваргын алтан медалиар энгэр юүгээ мялааж  2005, 2007 онуудад хүрэл медаль хүртэн тогтвортой амжилт гаргаж ирлээ.

ФИДЕ мастер Ц.Батчулуун 2006 онд Итали улсын Турин хотод зохиогдсон дэлхийн шатрын 37-р олимпиадад эх орон, шатарчин нөхдөө төлөөлөн 1-р ширээнд амжилттай тоглосон юм. Мөн өсвөрийн шатарчдын Азийн аврага шалгаруулах 1998 оны тэмцээнд шагналт 4-р байр эзэлжээ. Батчулуун өдгөө МУҮИС – ийн МКС – ын оюутан байв. 

Түүний нөр их хөдөлмөрийг Төр засгаас өндрөөр үнэлж Монгол Улсын Гавъяат тамирчин цолоор шагнасан билээ.