1954 оны 11-р сард эмэгтэй шатарчдын улсын аварга шалгаруулах анхдугаар тэмцээн Улаанбаатар хотноо зохиогдоход 13 өргөөс 11 хожин, 2 тэнцэж нэг ч хожигдолгүй түрүүлсэн хүн бол Д.Бямбаа юм. Тэрээр 1930 онд Дорнод аймгийн Чойбалсан суманд малчны гэрт төржээ. 1940 онд бага сургууль, 1953 онд Намын дээд сургууль, 1968 онд УБДС одоогийн МУБИС-ийг түүх, газар зүйн багшийн мэргэжлээр төгссөн.

15 настайдаа нутгийн сайн шатарчид Гомбожав, Сэнгээ нараар шатар заалган сурч уг спортын төрөлд өөрийн сэтгэл зүрхээ зориулжээ. Улсын аварга шалгаруулах шигшээ тэмцээнд 17 удаа оролцож 209 өрөг тоглохдоо 58 тэнцсэн нь хэн ч эвдээгүй амжилт юм. Д.Бямбаа нь ихэвчлэн задгай хурц байрлалаар тоглодог байлаа.

Мөн тэрээр Улсын аварга шалгаруулах 1, 4, 6, 7-р тэмцээнүүдэд түрүүлсэн юм. 1962 онд спортын мастер цол хүртэж, 1972 онд Югослав улсын Скопле хотноо болсон Дэлхийн шатрын олимпод эх орноо төлөөлөн оролцжээ.