Н.Тунгалаг 1969 онд Улаанбаатар хотод төрсөн. 1986 онд нийслэлийн 77-р сургууль, 1990 онд ОХУ-ын Ленинградын их сургуулийг эдийн засагч мэргэжлээр төгссөн. Түүнийг шатарчин болоход гэр бүлийн нөлөө их байсан нь ойлгомжтой. Ах нараа дагаж шатрын спортод хөл тавьсан энэ хүн өсвөрийн шатарчдын улсын аварга шалгаруулах тэмцээнээс 1985 онд алт, 1983, 1984, 1986 онуудад мөнгөн медаль хүртэж шатрын гараагаа эхэлжээ.

Насанд хүрэгчдийн улсын аварга шалгаруулах шигшээ тэмцээнд 15 удаа оролцохдоо 185 өрөг тоглож, 1993 онд түрүүлэн улсын аварга хэмээх эрхэм алдарт хүрчээ.

1986 онд спортын мастер, 1997 онд Дэлхийн шатрын холбооны мастер цолыг тус тус хүртсэн бөгөөд Москва, Манилын дэлхийн шатрын олимпиадад улсаа төлөөлөн амжилттай оролцож байлаа.