Улсын аварга Д.Мажигсүрэн 1976 онд Говь-Алтай аймагт төржээ. Шатарчин болоход нь түүний эцэг спортын дэд мастер Ц.Довдон нөлөөлж, улмаар түүнийг дасгалжуулан улсын аварга цолонд хүргэсэн юм. 1994 онд Говь-Алтай аймгийн Алтай сумын дунд сургууль, 2001 онд МУИС-ийн Олон улсын харилцааны дээд сургуулийг англи судлалын мэргэжлээр төгссөн.

Тэрээр улсын аварга шалгаруулах шигшээ тэмцээнд 10 удаа оролцож 124 өрөг тоглохдоо 1998 онд түрүүлэн, 1994, 1995 онд мөнгө, 1991, 1993, 1999, 2000 онд хүрэл медалийн эзэн болжээ. 1993 онд спортын мастер, 1995 онд дэлхийн шатрын холбооны мастер цолыг тус тус хүртсэн байна. Мөн Москва, Ереван, Элистэйн дэлхийн шатрын олимпиадад амжилттай оролцож байсан юм.