Монгол
English
БНХАУ-ын Харбин хотод Азийн өвлийн спортын IX наадам хөшгөө нээж, “Шар тив”-ийн 34 орны 12 мянга гаруй тамирчин шилдгээ тодруулахаар хуран чууллаа. Энэ удаагийн наадамд Монголын багийн онцлох амжилт, бас содон үйл явдал элбэг байна. Өдгөө ид өрнөж буй шорт трейкийн төрөлд эх орныхоо нэрийг өндөрт өргөж яваа “Хоёр Мөнх”-ийг энд онцлоё. Тэд Монголын шорт трейкийн өнгийг тодорхойлж буй нэрт нэгт.
ХХ зууны тэн хагаст бөхийн зүлэг ногоон дэвжээнээ ид хаваа гайхуулан барилдаж явсан эгэлгүй хүчтэн Ж.Мөнхбат, Х.Баянмөнх нарыг манай ард түмэн “Хоёр Мөнх” хэмээн онцгойлон тодотгосон байдаг бол өнөө цагийн өвлийн спортын мөсөн замд ган хөлгийнхөө ирийг хурцлан хурдлагч “Том” Г.Мөнх-Эрдэнэ, “Жижиг” Э.Мөнх-Эрдэнэ нарыг онцлохгүй байх аргагүй. Тэд өнөөдөр “Харбин-2025” Азийн өвлийн спортын наадмын өрсөлдөөнд үүргээ амжилттай биелүүлж, хоёул улсынхаа дээд амжилтыг шинэчлэн тогтоосон нь тэмдэглүүштэй.
“Хоёр Мөнх” маань өдгөө Үндэсний шигшээ багийн дасгалжуулагч Батчулууны Бат-Оргилын удирдлага дор бэлтгэл сургуулилтаа хангаж, удахгүй урд хөршийн нийслэлд өрнөх ДАШТ-нд оролцохоор зэхэж байна. Тэд саяхан Дэлхийн оюутны спортын Универсиад наадамд дөрөө харшуулан уралдсан ба Филиппинд болсон олон улсын тэмцээнд үнэмлэхүй амжилт гаргаж, Зүүн Азийн наадмаас хоёул аваагүй медаль үгүй билээ.
Та системд нэвтэрч орсоноор сэтгэгдэл бичих болон үнэлгээ өгөх боломжтой болно.