Мэдээ

“ЭРҮҮЛ МОНГОЛ ХҮН” үндэсний хөдөлгөөний хүрээнд Биеийн тамир, спортын улсын хороо, Монголын иогчдын холбоо, “Uuree dance” бүжгийн клуб хамтран Хүүхэд залуучуудын сургалт хүмүүжлийн тусгай цогцолборт иог болон бүжгийн сургалт зохион байгуулж, хүүхдийг бага балчраас нь бие бялдрын зөв хөгжилтэй, хөдөлгөөний эвсэлтэй эрүүл хүн болоход дасгал хөдөлгөөн, иог бүжиг ямар чухал болохыг сурталчлан таниулав.

Өдөрлөгт дээрх байгууллагын 60 орчим хүүхэд, 10 гаруй багш, ажилтан албан хаагч хамрагдсан бөгөөд МИХ-ны гишүүн багш, “Ruby” иогийн төвийн үүсгэн байгуулагч П.Энхтуяа нэг хүүхдийг үнэ төлбөргүйгээр цирк болон акробатын хичээлд хамруулж, “UUREE DANCE "бүжгийн клубын үүсгэн байгуулагч, бүжгийн багш Ж.Үүрийнтуяа, н.Саруул, н.Анхбаяр багш нар тус цогцолборын хүүхдэд багачуудад анхан шатны хичээл заахын сацуу таван хүүхэд, хоёр багшид клубдээ үнэгүй хамрагдах эрхийн бичиг гардуулсан нь сайшаалтай. Мөн “TV coctail” хамтлагийн жүжигчин, хөтлөгч Э.Цолмонбаяр уригдан оролцож, хүүхдүүдэд өөртөө итгэлтэй байх, хамт олон болон эргэн тойрныхоо хүмүүст хүндэтгэлтэй хандах зэрэг хүүхдэд зориулсан хувь хүний хөгжлийн сургалт зохион байгуулсан юм.  

Түүнчлэн Хувь хүний хөгжлийн институтын багш, МИХ-ны УЗ-ийн гишүүн С.Халиунаа 4-18 насны хүүхдийг нийгэмшүүлэх, зөв төлөвшүүлэх, авьяас чадварыг нь нээн илрүүлэх, нийгэмд биеэ даасан хувь хүн болгох тал дээр тухайн төвийн удирдлага болон албан хаагчидтай нээлттэй ярилцаж, тэдэнд тулгардаг нийгмийн асуудлыг хэлэлцэж, багш албан хаагчдад стресс тайлах менежмент, иог бясалгалын хичээлийг МИХ-ны бүртгэлтэй төвүүдтэйгээ хамтран хүргэх талаар ярилцлаа.